श्री नमिनाथ जिन पूजा

श्री नमिनाथ जिनेन्द्र नमौं विजयारथ नन्दन |

विख्यादेवी मातु सहज सब पाप निकन्दन ||

अपराजित तजि जये मिथिलापुर वर आनन्दन |

तिन्हें सु थापौं यहाँ त्रिधा केरिके पदवन्दन ||

ॐ ह्रीं श्रीनमिनाथजिनेन्द्र ! अत्र अवतर अवतर संवौषट् |

ॐ ह्रीं श्रीनमिनाथजिनेन्द्र ! अत्र तिष्ठ तिष्ठ ठः ठः |

ॐ ह्रीं श्रीनमिनाथजिनेन्द्र ! अत्र मम सन्निहितो भव भव वषट् |

 

सुरनदी जल उज्ज्वल पावनं, कनक भृंग भरौं मन भावनं |

जजतु हौं नमि के गुन गाय के, जुगपदांबुज प्रीति लगाय के ||

ॐ ह्रीं श्रीनमिनाथजिनेन्द्राय जन्मजरामृत्युविनाशनाय जलं नि.स्वाहा |1|

 

हरिमलय मिलि केशर सों घसौं, जगतनाथ भवातप को नसौं |

जजतु हौं नमि के गुन गाय के, जुगपदाम्बुज प्रीति लगाय के ||

ॐ ह्रीं श्रीनमिनाथजिनेन्द्राय भवातापविनाशनाय चन्दनं नि.स्वाहा |2|

 

गुलक के सम सुन्दर तंदुलं, धरत पुञ्जसु भुंजत संकुलं |

जजतु हौं नमि के गुन गाय के, जुगपदाम्बुज प्रीति लगाय के ||

ॐ ह्रीं श्रीनमिनाथजिनेन्द्राय अक्षयपदप्राप्तये अक्षतान् नि.स्वाहा |3|

 

कमल केतुकी बेलि सुहावनी, समरसूल समस्त नशावनी |

जजतु हौं नमि के गुन गाय के, जुगपदाम्बुज प्रीति लगाय के ||

ॐ ह्रीं श्रीनमिनाथजिनेन्द्राय कामबाणविध्वंसनाय पुष्पं नि.स्वाहा |4|

 

शशि सुधासम मोदक मोदनं, प्रबल दुष्ट छुधामद खोदनं |

जजतु हौं नमि के गुन गाय के, जुगपदाम्बुज प्रीति लगाय के ||

ॐ ह्रीं श्रीनमिनाथजिनेन्द्राय क्षुधारोगविनाशनाय नेवैद्यं नि.स्वाहा |5|

 

शुचि घृताश्रित दीपक जोइया, असम मोह महातम खोइया |

जजतु हौं नमि के गुन गाय के, जुगपदाम्बुज प्रीति लगाय के ||

ॐ ह्रीं श्रीनमिनाथजिनेन्द्राय मोहान्धकार विनाशनाय दीपं नि.स्वाहा |6|

 

अमरजिह्व विषें दशगंध को, दहत दाहत कर्म कबंधको |

जजतु हौं नमि के गुन गाय के, जुगपदाम्बुज प्रीति लगाय के ||

ॐ ह्रीं श्रीनमिनाथजिनेन्द्राय अष्टकर्मदहनाय धूपं नि.स्वाहा |7|

 

फलसुपक्व मनोहर पावने, सकल विघ्न समुह नशावने |

जजतु हौं नमि के गुन गाय के, जुगपदाम्बुज प्रीति लगाय के ||

ॐ ह्रीं श्रीनमिनाथजिनेन्द्राय मोक्षफल प्राप्तये फलं नि.स्वाहा |8|

 

जल फलादि मिलाय मनोहरं, अरघ धारत ही भवभय हरं |

जजतु हौं नमि के गुन गाय के, जुगपदाम्बुज प्रीति लगाय के ||

ॐ ह्रीं श्रीनमिनाथजिनेन्द्राय अनर्घ्यपदप्राप्तये अर्घ्यं नि.स्वाहा |9|

 

   पंच कल्याणक अर्घ्यावली

गरभागम मंगलचारा, जुग आश्विन श्याम उदारा |

हरि हर्षि जजे पितुमाता, हम पूजें त्रिभुवन-त्राता ||

ॐ ह्रीं आश्विनकृष्ण द्वितीयां गर्भकल्याणकप्राप्ताय श्रीनमि. अर्घ्यं नि.स्वाहा |1|

 

जनमोत्सव श्याम असाढ़ा, दशमी दिन आनन्द बाढ़ा |

हरि मन्दर पूजे जाई, हम पूजें मन वच काई ||

ॐ ह्रीं आषाढ़कृष्ण दशम्यां जन्ममंगलमण्डिताय श्रीनमि. अर्घ्यं नि.स्वाहा |2|

 

तप दुद्धर श्रीधर धारा, दशमी कलि षाढ़ उदारा |

निज आतम रस झर लायो, हम पूजत आनन्द पायो ||

ॐ ह्रीं आषाढ़कृष्ण दशम्यां तपोमंगलमण्डिताय श्रीनमि. अर्घ्यं नि.स्वाहा |3|

 

सित मगसिर ग्यारस चूरे, चव घाति भये गुण पूरे |

समवस्रत केवलधारी, तुमको नित नौति हमारी ||

ॐ ह्रीं मार्गशीर्षशुक्लैकादश्यां केवलज्ञानप्राप्ताय श्रीनमि. अर्घ्यं नि.स्वाहा |4| 

 

वैसाख चतुर्दशि श्यामा, हनि शेष वरी शिव वामा |

सम्मेद थकी भगवन्ता, हम पूजें सुगुन अनन्ता ||

ॐ ह्रीं वैशाखकृष्ण चतुर्दश्यां मोक्षमंगलप्राप्ताय श्रीनमि. अर्घ्यं नि.स्वाहा |5|

 

 जयमाला

दोहा

आयु सहस दश वर्ष की, हेम वरन तनसार |

धनुष पंचदश तुंग तनु, महिमा अपरम्पार |1|

 

जय जय जय नमिनाथ कृपाला, अरिकुल गहन दहन दवज्वाला |

जय जय धरम पयोधर धीरा, जय भव भंजन गुन गम्भीरा |2|

 

जय जय परमानन्द गुनधारी, विश्व विलोकन जनहितकारी |

अशरन शरन उदार जिनेशा, जय जय समवशरन आवेशा |3|

 

जय जय केवल ज्ञान प्रकाशी, जय चतुरानन हनि भवफांसी |

जय त्रिभुवनहित उद्यम वंता, जय जय जय जय नमि भगवंता |4|

 

जै तुम सप्त तत्व दरशायो, तास सुनत भवि निज रस पायो |

एक शुद्ध अनुभव निज भाखे, दो विधि राग दोष छै आखे |5|

 

दो श्रेणी दो नय दो धर्मं, दो प्रमाण आगमगुन शर्मं |

तीनलोक त्रयजोग तिकालं, सल्ल पल्ल त्रय बात बलालं |6|

 

चार बन्ध संज्ञागति ध्यानं, आराधन निछेप चउ दानं |

पंचलब्धि आचार प्रमादं, बंध हेतु पैताले सादं|7|

 

गोलक पंचभाव शिव भोने,छहो दरब सम्यक अनुकोने|

हानिवृद्धि तप समय समेता, सप्तभंग वानी के नेता |8|

 

संयम समुद् घात भय सारा, आठ करम मद सिध गुन धारा |

नवों लबधि नवतत्व प्रकाशे, नोकषाय हरि तूप हुलाशे |9|

 

दशों बन्ध के मूल नशाये, यों इन आदि सकल दरशाये |

फेर विहरि जगजन उद्धारे, जय जय ज्ञान दरश अविकारे |10|

 

जय वीरज जय सूक्षमवन्ता, जय अवगाहन गुण वरनंता |

जय जय अगुरुलघू निरबाधा, इन गुनजुत तुम शिवसुख साधा |11|

 

ताकों कहत थके गनधारी, तौ को समरथ कहे प्रचारी |

तातैं मैं अब शरने आया, भवदुख मेटि देहु शिवराया |12|

 

बार बार यह अरज हमारी, हे त्रिपुरारी हे शिवकारी ||

परपरणति को वेगि मिटावो , सहजानन्द स्वरुप भिटावो |13|

 

वृन्दावन जांचत शिरनाई, तुम मम उर निवसो जिनराई |

जब लों शिव नहिं पावौं सारा, तब लों यही मनोरथ म्हारा |14|

 

जय जय नमिनाथं हो शिवसाथं, औ अनाथ के नाथ सदं |

तातें शिर नायौ, भगति बढ़ायो, चीह्न चिह्न शत पत्र पदं |15|

ॐ ह्रीं श्रीनमिनाथ जिनेन्द्राय पूर्णार्घ्यं निर्वपामीति स्वाहा |

 

 श्री नमिनाथ तने जुगल, चरन जजें जो जीव |

  सो सुर नर सुख भोगकर, होवें शिवतिय पीव ||

  इत्याशीर्वादः (पुष्पांजलिं क्षिपेत्)